ஸ்டெர்லைட்டும் தமிழ்நாடும்… 1994 முதல் 2019 வரை…

ஸ்டெர்லைட்
Share

ஸ்டெர்லைட் – முழு காலக்கோடு

லண்டனில் செயல்பட்டுவரும் வேதாந்தா ரிசோர்ஸ் நிறுவனத்தின் தலைவர் அனில் அகர்வாலுக்கு சொந்தமான நிறுவனமே ஸ்டெர்லைட்

ஸ்டெர்லைட் ஆலை முதலில் அமைக்கப்பட்ட இடம் மஹாராஷ்டிராவின் ரத்தினகிரி மாவட்டம் ஆகும். ஆனால் 1993ல் அங்கிருந்த விவசாயிகள் தங்கள் அல்போன்சா மாம்பழத் தோப்புகளுக்கு இவை பாதகமாக அமையும் என்று, ஆலைக்கு உள்ளே புகுந்து அடித்து நொறுக்கியதால், அன்றைய மஹாராஷ்டிர முதல்வர் சரத் பவார் ஸ்டெர்லைட் உரிமத்தைத் திரும்பப் பெற்றார்.

பின்னர் குஜராத்திலும், கோவாவிலும் நுழைய ஸ்டெர்லைட் முயற்சி செய்தது. அங்கெல்லாம் அனுமதி கிடைக்காத நிலையில்தான் தமிழகத்தை ஸ்டெர்லைட் அணுகியது.

தூத்துக்குடியில் ஸ்டெர்லைட் தாமிர ஆலை அதிமுக ஆட்சி செய்த 1994ல் அடிக்கல் நாட்டப்பட்டு, திமுக ஆட்சி செய்த 1996 முதல் இயங்கத் தொடங்கியது.

1996ஆம் ஆண்டில் தாமிர மூலப் பொருட்கள் ஆலைக்கு வந்தபோதே, ஆலைக் கழிவால் மீன்வளம் பாதிக்கப்படும் என மீனவர்கள் கடல்வழி முற்றுகைப் போராட்டத்தைத் தொடங்கினர்.

பின்னர் தொடர்ந்து கடந்த 22 ஆண்டுகளாக மூச்சுத் திணறல் ஏற்படுகிறது, புற்றுநோய் ஏற்படுகிறது, நிலத்தடிநீர் பாதிக்கப்பட்டு உள்ளது என்று பல்வேறு புகார்கள் பதிவாகி உள்ளன. ஆலைக்கு எதிராக பல்வேறு போராட்டங்களும் தொடர்ந்து நடந்து வருகின்றன.

1997 ஜூலை 5ஆம் தேதி ஸ்டெர்லைட் ஆலையில் இருந்து நச்சுப்புகை வெளியேறியதால் 150க்கும் மேற்பட்டோர் மயக்கம் அடைந்தனர். சில கருவுற்ற பெண்களுக்கு கருச்சிதைவும் நடந்ததாகக் கூறப்படுகிறது. இதையடுத்து அதிகாரிகள் ஆலையை மூடினர். ஆனால் அடுத்த 38 நாட்கள் கழித்து ஆலை மீண்டும் திறக்கப்பட்டது.

சில வாரங்கள் கழித்து செம்புக் கலவையின் உலை வெடித்து இரண்டு ஊழியர்கள் பலியானார்கள். இதனால் மீண்டும் மூடப்பட்ட ஸ்டெர்லைட் மீண்டும் திறக்கப்பட்டது.

1996ல் மீண்டும் ஸ்டெர்லைட்டில் இருந்து நச்சுப்புகை வெளியேறி அருகில் இருந்த இந்திய வானொலி நிலைய ஊழியர்கள் மயங்கிவிழ மீண்டும் சர்ச்சை ஏற்பட்டது.

1996 நவம்பர் 7ஆம் தேதி ஸ்டெர்லைட் எதிர்ப்பு இயக்கம் சென்னை உயர்நீதிமன்றத்தில் ஆலைக்குத் தடை விதிக்கக் கோரி வழக்கிட்டது. இதில் தன்னையும் சேர்க்கக் கோரி வைகோ மனு போட, அவரும் வழக்கு தொடுப்பவராக சேர்க்கப்பட்டார். வழக்கு தொடர்ந்தது.

இடையில் உயர்நீதிமன்றம் தேசிய சுற்றுச் சூழலுக்கான பொறியியல் ஆராய்ச்சி மையமான ‘நீரி’யிடம், ஸ்ட்ஃபெர்லைட் குறித்த ஆய்வறிக்கையைக் கோரியது.

ஸ்டெர்லைட் ஆலையில் ஆய்வு செய்த நீரி அங்கு பாதுகாப்பற்ற முறையில் கழிவுகள் குவித்து வைக்கப்பட்டுன் உள்ளதாகவும், ஸ்டெர்லை கழிவுகள் சுர்ருவட்டாரப் பகுதியின் நிலத்தடி நீரை பாதிப்பதாகவும் அறிக்கை கொடுத்தது. ஸ்டெர்லைட்டை மூட உத்தரவிட்டது உயர்நீதிமன்றம்.

நீரி அறிக்கையில் உள்ள குறைகளை சரி செய்துவிட்டதாககவும், நீரி மீண்டும் ஆய்வுக்கு வரலாம் எனவும் மனு செய்துவிட்டு ஆலையை மீண்டும் இயக்கத் தொடங்கியது ஸ்டெர்லைட். நீரியின் மீளாய்வு அறிக்கையும் அதற்கு சாதகமாக இருந்தது.

1996ல் உயர்நீதிமன்றத்தில் தொடரப்பட்ட வழக்கில் 2010ல் தீர்ப்பு வந்தது. நீதிபதி எலிப்பி தர்மாராவ் ஸ்டெர்லைட்டை நிரந்தரமாக மூட உத்தரவிட்டார். இந்தத் தீர்ப்புக்கு இடைக்காலத் தடை பெற்ற ஸ்டெர்லைட், உச்சநீதிமன்றத்தில் மேல் முறையீடு செய்தது.

உச்சநீதிமன்றத்தில் வழக்கு நடைபெற்றபோதே, 2013ல் ஸ்டெர்லைட் ஆலையில் இருந்து நச்சுவாயு கசிய, தமிழக அரசே ஆலையை மூட உத்தரவிட்டது.

2013 ஏப்ரல் 2ல், ஸ்டெர்லைட் வழக்கில் இறுதித் தீர்ப்பை வழங்கிய உச்ச நீதிமன்றம், ஸ்டெர்லைட்டுக்கு 100 கோடி அபராதம் மட்டும் போட்டுவிட்டு, தொடர்ந்து இயங்க அனுமதி அளித்தது.

இதுவரை நீதித்துறையை நம்பி வந்த தூத்துக்குடி பொதுமக்கள் தாங்களே களத்தில் இறங்கிப் போராடியது 2013ஆம் ஆண்டுக்குப் பின்னர்தான்.

இந்நிலையில் சிப்காட் நிறுவனத்துக்காக – என்று கூறி மக்களிடம் கையகப்படுத்தப்பட்ட நிலத்தில் ஸ்டெர்லைட் ஆலையானது விரிவாக்கம் செய்யப்பட இருக்கின்றது என்ற தகவல் கடந்த பிப்ரவரியில் தூத்துக்குடிமக்களிடம் பொறியாக விழுந்து நெருப்பாகப் பற்றியது.

640 ஏக்கர் நிலத்தில், மிகப் பரந்த அளவில் நிர்மாணிக்கப்பட உள்ள ஸ்டெர்லைட் ஆலைக்கு எதிராக தூத்துடி மக்கள், வணிகர்கள் மற்றும் பல்வேறு அமைப்பினர் போராட்டத்தில் குதித்தனர்.

உடனே ஸ்டெர்லைட் நிர்வாகம், ‘விரிவாக்கத்துக்கு முறையான அனுமதி பெறப்பட்டு உள்ளது, ஸ்டெர்லைட்டில் கழிவுகள் வெளியேற்றம் பூஜ்ஜியம்தான். கழிவுகளையும் சூழலுக்கு மாசு ஏற்படாத வகையில்தான் அப்புறப்படுத்துகிறோம், மாசு வெளியேற்றத்தை கவனமாக கண்காணிப்போம், நீர்த்தேவைக்கு கடல்நீரை நன்னீராக்கியே பயன்படுத்துவோம்’ – என நீண்ட விளக்கத்தை அளித்தது. போராட்டக்காரர்கள் இதனை ஏற்கவில்லை.

ஸ்டெர்லைட் விரிவாக்கம் குமரெட்டியாபுரத்திற்கு அருகில் இருந்ததால், கடந்த பிப்ரவரி மாதம் முதல் ஸ்டெர்லைட்டுக்கு எதிராக அமைதியான முறையில் குமரெட்டியாபுரம் மக்கள் தொடர்ந்து போராடினர்.

தூத்துக்குடி மக்களின் தொடர் போராட்டம் தமிழகம் முழுவதும் கவனத்தைப் பெற்றது, பெரும்பாலான அரசியல் கட்சிகள் ஸ்டெர்லைட்டுக்கு எதிராகவும் போராட்டக்காரர்களுக்கு ஆதரவாகவும் தங்கள் கருத்துகளை பதிவு செய்தனர். மார்ச் 24ல் நடைபெற்ற வணிகர்களின் போராட்டம் 20,000க்கும் மேற்பட்டோர் பங்கேற்றதால் தமிழகம் முழுவதும் பலத்த அதிர்வை ஏற்படுத்தியது.

மார்ச் 26ல் லண்டன் தமிழர்கள் ஸ்டெர்லைட் உரிமையாளர் அனில் அகர்வாலின் வீடு முன்னர் போராட்டம் நடத்தினர்.

ஏப்ரல் 2 அன்று போராட்டம் தனது 50 ஆவது நாளை எட்டியது. ஏப்ரல்5ல் ஸ்டெர்லைட் முற்றுகைப் போராட்டத்துக்கு முயன்ற மார்க்சிஸ்ட் கட்சியினர் 540 பேர் கைது செய்யப்பட்டனர். அன்று மாலை திமுகவின் ஆர்ப்பாட்டமும் நடைபெற்றது. ஏப்ரல் 8 அன்று காவிரி மற்றும் ஸ்டெர்லைட்டுக்காக தமிழ்த் திரையுலகினர் மவுனப் போராட்டத்தில் ஈடுபட்டனர்.

ஏப்ரல் 9 அன்று, தமிழக மாசுக்கட்டுப்பாட்டு வாரியம் ஸ்டெர்லைட் ஆலைக்கு வழங்கிய அனுமதி கடந்த மார்ச் 31ஆம் தேதியோடு முடிவடைந்தநிலையில், அதனை நீட்டிக்க தமிழக அரசு மறுப்பு தெரிவித்தது.

ஏப்ரல் 13 அன்று ஸ்டெர்லைட்டின் ஊழியர்கள் மற்றும் அவர்களின் குடும்பத்தினர் 4,500 பேர் ஸ்டெர்லைட்டைத் தொடர்ந்து இயக்கக் கோரி, ஆட்சியர் அலுவலக வாயிலில் போராட்டத்தில் ஈடுபட்டனர்.

ஆலைக்கான மின்சாரம் மற்றும் தண்ணீர் இணைப்பு துண்டிக்கப்பட்டதாக கடந்த மே 28-ல் தமிழக அரசு அரசாணை வெளியிட்டது.

ஏப்ரல் 30 அன்று ஸ்டெர்லைட் ஆலையின் மேம்பாட்டு இயக்குநர் ஆர்.கிஷோர்குமார் ஒரு ஆங்கில இதழுக்கு அளித்த பேட்டியில் ‘ஸ்டெர்லைட்டை மூடுவது என்ற பேச்சுக்கே இடமில்லை’ – என்றார். இது மக்களிடையே பெரும் கொந்தளிப்பை ஏற்படுத்தியது.

இந்த சூழலில்தான் மக்கள் போராட்டம் 100ஆவது நாளை எட்டும் சூழலில், மே 21ஆம் தேதி இரவு 10 மணி முதல், முதல் 23 ஆம் தேதி காலை 8 மணி வரை தூத்துக்குடி தெற்கு காவல் நிலையம், சிப்காட் காவல் நிலையம் ஆகியவற்றின் எல்லைகளுக்கு உட்பட்ட பகுதிகளுக்கு ஆட்சியரால் 144 தடை உத்தரவு பிறப்பிக்கப்பட்டது..

போராட்டத்தின் போது நடந்த வன்முறைகளைத் தடுக்க நடைபெற்ற துப்பாக்கிச் சூட்டில் 13 பேர் பலியாகினர். இதையடுத்து ஸ்டெர்லைட் ஆலையை தமிழக அரசு மூடியது.

தமிழக அரசின் அரசாணையை எதிர்த்து தேசிய பசுமை தீர்ப்பாயத்தில் வேதாந்தா நிறுவனம் வழக்கு தொடர்ந்தது.

முன்னாள் தலைமை நீதிபதி தருண் அகர்வால் தலைமையில் அமைக்கப்பட்ட குழுவானது, நேரடியாக ஆய்வு செய்து பசுமை தீர்ப்பாயத்தில் அறிக்கை தாக்கல் செய்தது. இந்த அறிக்கை ஸ்ரெட்லைட் ஆலையை மீண்டும் திறக்கப் பரிந்துரைத்தது.

அதனடிப்படையில் தேசிய பசுமை தீர்ப்பாயம் ஸ்டெர்லைட் ஆலை மீண்டும் இயங்க தமிழக அரசு அனுமதிக்க வேண்டும் எனக் கடந்த 2018, டிசம்பர் 15-ம் தேதி உத்தரவிட்டனர். இதை எதிர்த்து தமிழக அரசு சார்பில் மேல்முறையீடு செய்யப்பட்டது..

டிசம்பர் 21ல் மதுரை உயர்நீதிமன்றக் கிளை ஸ்டெர்லைட்டைத் திறக்கும் நடவடிக்கைகளில் வேதாந்தா ஈடுபடக் கூடாது – என உத்தரவிட்டு, தேசிய பசுமைத் தீர்ப்பாயத்தின் உத்தரவு மீதான தமிழக அரசின் மேல்முறையீடு குறித்து ஜனவரி 21ல் தெரிவிக்கலாம் என்று கூறி வழக்கை ஒத்திவைத்தனர்.

இந்த நிலையில் உச்ச நீதிமன்ற தலைமை நீதிபதி ரஞ்சன் கோகோய் தலைமையிலான அமர்வு, மனுவை விசாரணைக்கு எடுத்து கொள்வது குறித்து ஜனவரி 03, 2019ல் பரிசீலித்தது. அப்போது  இருதரப்பு  வழக்கறிஞர்களும் ஆஜராகினர்.

அப்போது தமிழக அரசு தரப்பில் ஆஜரான வழக்கறிஞர் யோகேஷ் கண்ணா, இந்த வழக்கில் ஆவணங்களை சரியான முறையில் தீர்ப்பாயம் ஆராயவில்லை என தெரிவித்தார்.

வேதாந்தா நிறுவனம் சார்பில் ஆஜரான வழக்கறிஞர் ஸ்டெர்லைட் ஆலையில் அமிலத்தை சேமித்து வைக்கபோதுமான ஏற்பாடுகள் இல்லாததால் ஆலையை உடனடியாக திறக்க வேண்டும் என வலியுறுத்தினார்.

இதையடுத்து தமிழக அரசின் மேல்முறையீட்டு மனுவை விசாரணைக்கு ஏற்றுக்கொண்ட உச்ச நீதிமன்ற நீதிபதிகள், ஜனவரி 8-ம் தேதி விசாரணை தொடங்கும் என அறிவித்தனர்.

ஜனவரி 08 அன்று நடந்த விசாரணையில் தேசிய பசுமைத் தீர்ப்பாயத்தின் உத்தரவுக்கு தடை விதிக்க மறுத்த உச்ச நீதிமன்றம், மதுரை உயர் நீதிமன்றக் கிளையின் உத்தரவுக்கு தடை விதித்தது. இதனால் வேதாந்தா நிறுவனம் ஆலையை மீண்டும் இயக்க அனுமதி அளிக்கப்பட்டது.


Share

Related posts

மகாராஷ்டிராவில் வேதிப்பொருள் தொழிற்சாலையில் ஏற்பட்ட தீ விபத்து

Admin

அனிதா சொன்ன கடைசி மொழிகள்… உச்ச நீதிமன்றம் முன்பு

Admin

தொழில்நுட்பம் வாயிலாக புதிய பணி வாய்ப்புகளை பெற முடியும்: பியூஷ் கோயல்

Admin

Leave a Comment